ភ្នំពេញ (កម្ពុជា) ថ្ងៃទី៨ មីនា ២០០៩៖ ការលក់ឡាយឡុងអំពូលភ្លើង ដើម្បីយកទៅជួយអប់រំកុមារចិញ្ចឹម និងម្តាយរបស់ពួកគេដែលកំពុងស្ថិតនៅក្នុងពន្ធនាគារ
© វណ្ឌី រតនា
© វណ្ឌី រតនា
អង្គការ ក្រៅរដ្ឋាភិបាលនានា ដែលមានដំណើរនៅប្រទេសកម្ពុជា និងពឹងផ្អែកទៅលើមូលនិធិស្ថាប័ន កំពុងជួបបញ្ហាហិរញ្ញប្បទានដ៏ស្មុគស្មាញ។ ប្រធានអង្គការក្រៅរដ្ឋាភិបាលម្នាក់ សុំមិនបញ្ចេញឈ្មោះ បានពន្យល់ថា៖ «អត្ថប្រយោជន៍ពិតជាមានប្រាកដមែនក្នុងការពឹងផ្អែកលើ ហិរញ្ញប្បទានស្ថាប័ន ជាពិសេសប្រសិនបើសកម្មភាពរបស់លោកអ្នកមិនធ្វើអោយ អ្នកដទៃមានការរំជួលចិត្ត។ ប៉ុន្តែ គុណវិបត្តិវិញ គឺនីតិវិធីសាំញ៉ាំ ដែលយើងត្រូវគោរពតាមដូចជា គណនេយ្យភាព ភាពចាំបាច់នៃការបង្ហាញសកម្មភាពលេចធ្លោរបស់អង្គការដល់ដៃគូ ស្ថាប័ន។ ម្យ៉ាងទៀត យើងត្រូវសម្របទៅតាមរបៀបរបបនិយាយស្តីរបស់ពួកគេ និងដើរតាមការកំណត់ទិសរបស់ពួកគេ ដូចជាការការពារនីតិរដ្ឋ និងប្រជាធិបតេយ្យ យ៉េនឌ័រ…។ ជួនកាល ខ្ញុំនិយាយប្រាប់ខ្លួនឯងថា ប្រសិនជាខ្ញុំពិតជាធ្វើតាមគ្រប់យ៉ាងមែននោះ ខ្ញុំប្រហែលជាគ្មានពេលវេលាដាក់ដំណើរការបេសកកម្មដែលខ្ញុំបានរក ថវិកានោះទេ»។ គំនិតផ្តួចផ្តើមជាច្រើនបានផុសចេញឡើង ទន្ទឹមគ្នាជាមួយនឹងវិធីសាស្រ្តដោះស្រាយបញ្ហា ដើម្បីស្វែងរកមូលនិធិ ជួយស្រោចស្រង់អង្គការក្រៅរដ្ឋាភិបាលនៅប្រទេសកម្ពុជា។ ខាងក្រោមនេះជាវិធីសាស្រ្តផ្សេងៗរបស់អង្គការមួយចំនួន។
វេជ្ជបណ្ឌិតលេងវីយ៉ូឡុងសែល
ចាប់តាំងពីឆ្នាំ២០០០ លោក Beat Richner គ្រូពេទ្យឯកទេសជំងឺកុមារ និងជាអ្នកលេងវីយ៉ូឡុងសែល បានរៀបចំការប្រគំតន្រ្តី នៅខេត្តសៀមរាប ចំនួន១ ទៅ២ លើក ក្នុងមួយសប្តាហ៍។ គោលបំណង គឺប្រមូលថវិកាយកទៅអោយមន្ទីរពេទ្យគន្ធបុប្ផា ដើម្បីជួយព្យាបាលជំងឺកុមារនៅប្រទេសកម្ពុជា។ នៅឆ្នាំ២០០៨ ការប្រគំតន្រ្តីរបស់លោកប្រមូលបានថវិកាដោយផ្ទាល់ចំនួន២០ម៉ឺន ដុល្លារ។ ការប្រគំតន្រ្តីទាំងនេះក៏ទទួលជំនួយជាប្រយោល ពីសំណាក់ភ្ញៀវទេសចរ បន្ទាប់ពីពួកគេបានមកទស្សនានៅប្រទេសកម្ពុជា។ លោក Beat Richner បានពន្យល់ថា «នៅទីបំផុត យើងមានថវិកាចំនួនពី៥ ទៅ៧លានដុល្លារ ក្នុងមួយឆ្នាំ»។ សិល្បករ Beatocello រូបនេះ (ឈ្មោះរបស់លោកនៅពេលសំដែង) បានរៀបចំកញ្ចប់ថវិកាប្រចាំឆ្នាំចំនួន៣៤លានដុល្លារយ៉ាងប្រុង ប្រយ័ត្នសម្រាប់ដំណើរការរបស់មន្ទីរពេទ្យនេះ ហើយរហូតមកទល់ពេលនេះ រដ្ឋាភិបាលប្រទេសស្វីស និងរដ្ឋាភិបាលកម្ពុជាបាននាំយកថវិកាក្នុងម្នាក់ចំនួន ២លានដុល្លារ។ មន្ទីរពេទ្យគន្ធបុប្ផា មិនបានទទួលមូលនិធិស្ថាប័ននោះទេ ប៉ុន្តែទទួលបានអំណោយឯកជន ដែលមានទឹកប្រាក់ក្រោម៥០០ដុល្លារ។ ឆ្នាំនេះ លោក Beat Richner បានត្រៀមលក្ខណៈទប់ទល់នឹងផលប៉ះពាល់នៃវិបត្តិហិរញ្ញវត្ថុពិភពលោក តាមរយៈយុទ្ធនាការគាំទ្រមួយ ដែលរៀបចំធ្វើឡើងនៅចំណោមម្ចាស់ជំនួយ៩ម៉ឺននាក់ នៅប្រទេសស្វីស។ លោកបានសុំជំនួយឧបត្ថម្ភចំនួន២០ហ្រ្វង់ស្វីស (ជាង១៧ដុល្លារ) ដើម្បីធានាដំណើរការរបស់មន្ទីរពេទ្យ។ ក្រៅពីនេះ លោកក៏បានរៀបចំការប្រគំតន្រ្តីជាបន្តបន្ទាប់ នៅប្រទេសកំណើតរបស់លោកផងដែរ។
លក់ឥដ្ឋ ដើម្បីទិញជញ្ជាំង
ក្រៅអំពី បញ្ហាដំណើរការ អង្គការក្រៅរដ្ឋាភិបាលមួយចំនួនត្រូវប្រឈមមុខនឹងភាពភ្ញាក់ផ្អើល ដ៏អាក្រក់។ ជាក់ស្តែងនៅខែឧសភា ឆ្នាំ២០០៦ ម្ចាស់កម្មសិទ្ធិដី ដែលអង្គការមិត្តសំឡាញ់ជួល មានគោលបំណងប្រកាសលក់ដីរបស់ខ្លួន។ នេះគឺជាគ្រោះអាក្រក់មួយ។ អង្គការក្រៅរដ្ឋាភិបាលមួយនេះបានទទួលកុមាររស់នៅតាមចិញ្ចើមថ្នល់ ជិត២ ២០០នាក់ ក្នុងមួយថ្ងៃ និងព្យាយាមធ្វើសមាហរណកម្មពួកគេចូលទៅក្នុងសាលារៀន គ្រួសាររបស់ពួកគេ និងការងារ... អង្គការមិនមានបំណងចាកចេញពីតំបន់ ដែលស្ថិតនៅសង្កាត់ទេសចរណ៍មួយនេះទេ ព្រោះថាកុមារក្រីក្រជាច្រើនរស់នៅ និងធ្វើការនៅទីនោះ ហើយមានភោជនីយដ្ឋានមួយ ដែលតែងតែមានភ្ញៀវទេសចរប្រមាណជាង៧០%ចេញចូលមិនដាច់។ ដូចនេះ អង្គការសម្រេចចិត្តទិញដីថ្មី។ ប៉ុន្តែ អង្គការខ្វះខាតថវិកាចំនួន៣លានដុល្លារ។ ធនាគារ ANZ បានអោយខ្ចីឥណទាន តែអត្រាការប្រាក់ខ្ពស់ បច្ចុប្បន្នគឺ ១០%។ អ្នកស្រី ខេរីម ម៉ានីកា ទទួលបន្ទុកផ្នែកទំនាក់ទំនង មានគំនិតរៀបចំយុទ្ធនាការលក់ឥដ្ឋ ដែលគូរដោយកុមារនៃអង្គការមិត្តសំឡាញ់។ ម្ចាស់ជំនួយអាចបង់ប្រាក់តាមរយៈប្រព័ន្ធអ៊ីនធឺណែត ចំនួន៥០ដុល្លារ ក្នុងការទិញឥដ្ឋមួយដុំ ហើយគេនឹងឃើញឈ្មោះរបស់ខ្លួន នៅលើឥដ្ឋនោះ ដែលនឹងយកទៅដាក់តំរៀបត្រួតគរលើឥដ្ឋរបស់អ្នកឧបត្ថម្ភផ្សេងទៀត ដើម្បីបង្កើតជាជញ្ជាំងចម្រុះពណ៌ដ៏អស្ចារ្យមួយ។ បើតាម ផេននី ទីណាន អ្នកទទួលខុសត្រូវស្វែងរកមូលនិធិសម្រាប់ទិញដី យុទ្ធនាការនេះបាននាំយកថវិកាចំនួន២៥ ០០០ដុល្លារ សម្រាប់ឆ្នាំ២០០៨។
បណ្តាញផ្តួចផ្តើមគំនិតតូចៗចំនួន១០០១
វិបត្តិហិរញ្ញវត្ថុបានប៉ះពាល់ដល់អង្គការដើម្បីភាពញញឹម នៃកុមារ ដែលជាអង្គការក្រៅរដ្ឋាភិបាលមួយត្រូវបានបង្កើតឡើងដោយលោក គ្រីស្យង់ (Christian) និងម៉ារីហ្រ្វង់ ឌេ ប៉ាល្យែ (Marie-France des Pallières) នាឆ្នាំ១៩៩៣ នៅប្រទេសកម្ពុជា ដើម្បីជួយកុមារក្រីក្រ ។ លោកពិន សារ៉ាពេជ្រ នាយកកម្មវិធីនៅអង្គការនេះ កត់សម្គាល់ថា៖ «ជាធម្មតា យើងមានឪពុកម្តាយធម៌ចំនួន២០០នាក់ ដែលត្រូវបន្តធ្វើជាឪពុកម្តាយជារៀងរាល់ឆ្នាំ។ ប៉ុន្តែនៅឆ្នាំ២០០៨ យើងបានបាត់បង់ឪពុកម្តាយធម៌៥០០នាក់»។ ប្តីប្រពន្ធ ឌេ ប៉ាល្យែ ដែលដើរគ្រប់ច្រកល្ហកនៅប្រទេសបារាំង ដើម្បីប្រមែប្រមូលអំណោយពីប្រជាពលរដ្ឋ នឹងត្រូវខិតខំប្រឹងប្រែងទ្វេដង។ តាមរយៈវិធីសាស្រ្តដែលធ្លាប់ទទួលបានជោគជ័យជាច្រើនឆ្នាំមកនេះ ពួកគេបានទទួលការជួយឧបត្ថម្ភគាំទ្រដោយបណ្តាញដ៏រឹងមាំមួយដែលជា ប្រភពនៃគំនិតផ្តួចផ្តើមនានា ហើយនិងថវិកាឥតព្រាងទុក។ ឧទាហរណ៍ អាឡិច យុវជនអង់គ្លេស អាយុ១១ឆ្នាំ បានធ្វើកិច្ចសន្យាជាមួយឪពុកម្តាយរបស់ខ្លួន ថាគេនឹងទទួលបានប្រាក់១ផោន (១,៤ដុល្លារ) រៀងរាល់លើកដែលគេអានសៀវភៅមួយក្បាលចប់ ហើយសង្ខេបខ្លឹមសារសៀវភៅនោះបាន។ តាមរយៈការអានរបស់អាឡិច និងសិស្សសាលាផ្សេងទៀត ដែលបានចូលរួមគម្រោងនេះ អាឡិចបានប្រមូលប្រាក់បាន ១១ ០០០ ផោនសម្រាប់អង្គការដើម្បីភាពញញឹមនៃកុមារ។
ក្រៅពីនោះនៅមាន អ្នកឡើងភ្នំដើម្បីប្រមូលថវិកាជូនសមាគម ការប្រគល់ថវិកាដែលបានទទួលជាកាដូនៅក្នុងពិធីរៀបអាពាហ៍ពិពាហ៍ជា ដើម... ហើយនិងគំនិតផ្តួចផ្តើមជាច្រើនទៀតនៅប្រទេសកម្ពុជាផងដែរ។ ខណៈពេលដែលមហាសេដ្ឋីខ្មែរម្នាក់បានប្រគល់អំណោយជាទឹកប្រាក់ ៥០០ដុល្លារ សម្រាប់អង្គការ PSE ដោយមានលក្ខខណ្ឌថាត្រូវថតផ្សាយតាមទូរទស្សន៍នោះ ក៏នៅមានមនុស្សសាមញ្ញជាច្រើនបានផ្តល់អំណោយសមល្មម ប៉ុន្តែក៏មានប្រសិទ្ធភាពផងដែរ។ តួយ៉ាង បុគ្គលិកនៃអង្គការPSE បានផ្តល់វិភាគទានប្រចាំខែរយៈពេលមួយឆ្នាំ សម្រាប់អង្គការនេះ។ ជាលទ្ធផល អង្គការប្រមូលបានថវិកាប្រចាំខែចំនួន ១២០០ដុល្លារ។ អតីតសិស្សអង្គការនេះ ក៏បានរៀបចំរាត្រីកំសាន្ត ដើម្បីជួយអង្គការ PSE។ នៅថ្ងៃទី១០ ខែមេសាខាងមុខនេះ មជ្ឈមណ្ឌលនៅសង្កាត់ស្ទឹងមានជ័យនេះនឹងផ្លាស់ប្តូរទៅជាក្លឹប កំសាន្តដ៏ធំអស្ចារ្យមួយ។ ថវិកាដែលប្រមូលបាននឹងយកទៅផ្គត់ផ្គង់លើការរើលំនៅដ្ឋាន របស់គ្រួសារ ដែលប៉ះពាល់ពីការផ្លាស់ទីលានចាក់សំរាមថ្មីនៅក្នុងរាជធានី។
និន្នាការលក់ឡាយឡុង
ក្រៅ អំពីគំនិតផ្តួចផ្តើមរៀបចំពិធីជប់លៀងកំសាន្ត រឺការប្រគំតន្រ្តីសប្បុរសធម៌នៅប្រទេសកម្ពុជា ក៏នៅមានគំនិតផ្តួចផ្តើមដាក់លក់ឡាយឡុងគ្រឿងបរិក្ខារផងដែរ។ សិល្បករជាតិនិងអន្តរជាតិ បានផ្តល់វិភាគទាន និងប្រគល់ថវិកាដែលបានមកពីស្នាដៃរបស់ពួកគេ សម្រាប់ជួយអង្គការមួយ។ Café living Room បានរៀបចំការដាក់លក់ឡាយឡុងនូវអំពូលភ្លើងសិល្បៈ យកប្រាក់អោយទៅអង្គការលីកាដូ ដើម្បីផ្តល់អោយកុមារដែលរស់នៅជាមួយម្តាយនៅក្នុងពន្ធនាគារ នូវកន្លែងមានសុវត្ថិភាពមួយដែលពួកគេអាចទទួលបានការអប់រំ។
ដោយឡែក អង្គការស៊ីប៉ា ដែលពឹងផ្អែកលើការបង្កើតបណ្ណាល័យនៅទូទាំងប្រទេស និងអភិវឌ្ឍសកម្មភាពបោះពុម្ពសៀវភៅជាភាសាខ្មែរ បានទទួលថវិកាជិត៤៦ ០០០ដុល្លារ កាលពីខែកុម្ភៈ ដើម្បីបើកបណ្ណាល័យដ៏ធំមួយ និងរៀបចំសៀវភៅឯកសារមួយ ស្តីពីបរិស្ថាន។ ទឹកប្រាក់ឧបត្ថម្ភនេះគឺជាលទ្ធផលនៃការលក់ឡាយឡុង នៅលើបណ្តាញអ៊ីនធឺណែត។ ជាការពិតណាស់ អស់រយៈពេល៤ឆ្នាំមកហើយ អ្នកផលិតនាឡិកាដៃប្រណីតរបស់ប្រទេសស្វីស IWC បានរៀបចំនាឡិកាជាច្រើន ដោយសហការជាមួយ Fondation Saint-Exupéry ដើម្បីឧទ្ទិសកុសលជូនដល់អ្នកនិពន្ធគំរូ។ មានតែគំរូនាឡិកាដៃធ្វើអំពីផ្លាទីនប៉ុណ្ណោះ ដែលត្រូវបានដាក់លក់ឡាយឡុង ហើយថវិកាដែលបានមកពីការលក់ត្រូវប្រគល់អោយទៅគម្រោងមួយ ដើម្បីជួយសង្គ្រោះកុមារ ដែលត្រូវបានជ្រើសរើសដោយ Fondation ចំណែកគំរូនាឡិកាស៊េរីមួយចំនួនត្រូវលក់អោយទៅអ្នកវក់នឹងសិល្បៈ ណាមួយ រឺអ្នកចូលចិត្តធ្វើការប្រមូលផ្តុំវត្ថុ។
