ភ្នំពេញ (កម្ពុជា) ថ្ងៃទី១៩ មករា ២០០៩៖ ព្រះសង្ឃមួយអង្គនៅមុខការដ្ឋានសំណង់របស់ធនាគារកាណាឌីយ៉ា។ នេះជាអគារខ្ពស់មួយក្នុងចំណោមអគារខ្ពស់ៗជាច្រើនទៀតក្នុងក្រុង ភ្នំពេញ ដែលអាចនឹងបើកទ្វារផ្តល់កម្មសិទ្ធិអោយជនបរទេស។
©វណ្ឌី រតនា
©វណ្ឌី រតនា
ការដ្ឋាន សំណង់នៅទ្រឹងឥតកម្រើក ឬបន្ថយល្បឿន ព្រោះវាយប្រហារដោយព្យុះបក់បោកនៃវិបត្តិហិរញ្ញវត្ថុពិភពលោក រីឯតម្លៃដីធ្លីវិញធ្លាក់ចុះមិនអាចគ្រប់គ្រងបាន… ភាពរំជើបរំជួលមិនគួរអោយជឿនៃតម្លៃអចលនទ្រព្យ ដែលបានកើនឡើងនៅក្នុងព្រះរាជាណាចក្រខ្មែរដ៏តូចនេះ ក៏កំពុងជាប់គាំង។ ដើម្បីព្យាយាមធ្វើអោយវិស័យនេះដំណើរការឡើងវិញ រដ្ឋាភិបាលខ្មែរបានគាស់យកមកវិញនូវគំនិតមួយដែលធ្លាប់ត្រូវ គេលើកឡើងរួចហើយកាលពីអតីតកាល។ គំនិតនោះគឺការអនុញ្ញាតអោយជនបរទេសដែលមកតាំងលំនៅនៅកម្ពុជា អាចទទួលបានកម្មសិទ្ធិឯកជន។ សេចក្តីព្រាងច្បាប់មួយស្តីពីសិទ្ធិកម្មសិទ្ធិលើចំណែកឯកជននៃអគារ សហកម្មសិទ្ធិកំពុងតែត្រូវបានរៀបរៀងឡើង។ សេចក្តីព្រាងច្បាប់នេះនឹងអនុញ្ញាតអោយជនបរទេសទិញចំណែកឯកជន នៃអគារសហកម្មសិទ្ធិ ហៅថាសហវិជិតរាជ្យ (ខុនដូ) ដោយដាក់ឈ្មោះខ្លួនឯង។ នេះគឺជាវិធានការដែលបណ្តាទីភ្នាក់ងារអចលនវត្ថុនៅក្នុង ប្រទេសចង់បានជាយូរមកហើយ។
លោកសេក សេដ្ឋា អនុរដ្ឋលេខាធិការក្រសួងរៀបចំដែនដី ទទួលបន្ទុកឯកសារនេះបានថ្លែងថា ចាប់តាំងពីដំណាច់ឆ្នាំ២០០៨មក ក្រសួងរៀបចំដែនដី នគរូបនីយកម្ម និងសំណង់ ផ្តោតការយកចិត្តទុកដាក់ទៅលើការរៀបរៀងច្បាប់មួយនេះ ដែលឆ្លើយតបនឹងឆន្ទៈនយោបាយរបស់រដ្ឋាភិបាលក្រុងភ្នំពេញ ក្នុងការសម្រួលដល់ការងារជនបរទេស ជាពិសេសវិនិយោគិនបរទេសដែលមកតាំងទីលំនៅនៅកម្ពុជា។ លោកមានប្រសាសន៍ថា៖ «រដ្ឋាភិបាលបានដាក់គម្រោងនេះសិក្សាតាំងពីយូរមកហើយ ដោយយកគំរូតាមបណ្តាប្រទេសជិតខាង និងតាមប្រទេសនៅក្នុងតំបន់ដែលបានផ្តល់ការអនុញ្ញាតអោយជនបរទេស ក្លាយជាម្ចាស់កម្មសិទ្ធិរួចហើយ»។ លោកបន្ថែមទៀតថា ជាបឋម វិធានការនេះនឹងផ្តោតទៅលើជនបរទេសដែលមានសារៈប្រយោជន៍ដល់ប្រទេស កម្ពុជា ដូចជាការចូលរួមរបស់ពួកគេ ធ្វើអោយសេដ្ឋកិច្ចជាតិរីកចម្រើន ការការពារបរិស្ថាន និងធនធានធម្មជាតិ ឬវិស័យសង្គមកិច្ច។
អត្ថបទច្បាប់មួយនេះត្រូវបានទាមទារដោយទីភ្នាក់ងារអចលនវត្ថុសំខាន់ៗនៅកម្ពុជា។ លោកនាយកក្រុមហ៊ុនBonna Realty ដែលជាក្រុមហ៊ុនសំខាន់មួយនៅលើទីផ្សារអចលនទ្រព្យ និយាយថា លោកបានអំពាវនាវពីរឆ្នាំមកហើយអោយច្បាប់នេះត្រូវរដ្ឋសភាអនុម័ត អោយបានឆាប់។ លោកស៊ុង ប៊ុណ្ណា ហ៊ានភ្នាល់ថា៖ «នៅក្នុងដំណាក់កាលវិបត្តិសេដ្ឋកិច្ច រដ្ឋាភិបាលត្រូវតែពន្លឿនការដាក់ដំណើរការច្បាប់នេះ ព្រោះវាជាការអូសទាញវិនិយោគិន និងអ្នកការទូតបរទេស។ ពួកគេនឹងមានលទ្ធភាពមកធ្វើវិនិយោគ ដោយមិនចាំបាច់ជួលកន្លែងស្នាក់នៅ ហើយជាពិសេស ពេលគេមកស្នាក់នៅប្រទេសកម្ពុជាក្នុងរយៈពេលវែង។ ម្យ៉ាងទៀត វានឹងជួយធ្វើអោយទីផ្សារអចលនវត្ថុរបស់យើងមានសកម្មភាពឡើងវិញ!»។
លោកថោង វិច្ឆិកា អ្នកទទួលខុសត្រូវផ្នែកទីផ្សាររបស់ក្រុមហ៊ុនសាងសង់កូរ៉េខាងត្បូង De Castle Royal ក៏ចង់ឃើញវត្តមានច្បាប់នេះដែរ។ ក្រុមហ៊ុននេះជាអ្នកសាងសង់អគារខុនដូរខ្ពស់ៗមួយនៅក្រុងភ្នំពេញ។ លោកវាយ តម្លៃថា៖ «វិនិយោគិនបរទេសទន្ទឹងរង់ចាំច្បាប់នេះជាយូរមកហើយ ហើយវាគួរតែត្រូវបានអនុម័តតាំងពីមុនពេលមានវិបត្តិសេដ្ឋកិច្ច កើតឡើង»។
ទិញចំណែកឯកជននៃសហវិជិតរាជ្យ មិនមែនទិញដីទេ
ច្បាប់ភូមិបាលប្រកាសអោយប្រើនៅថ្ងៃទី៣០ ខែសីហា ឆ្នាំ២០០១ ចែងថា មានតែរូបវន្តបុគ្គល ឬនីតិបុគ្គលសញ្ជាតិខ្មែរទេ អាចទទួលបានកម្មសិទ្ធិដីធ្លីនៅកម្ពុជា។ បទបញ្ញាត្តិនេះនៅតែមានសុពលភាពដដែល។ លោកសេក សេដ្ឋា សង្កត់ធ្ងន់ថា ជនបរទេសនឹងទទួលបានកម្មសិទ្ធិតែនៅលើសហវិជិតរាជ្យប៉ុណ្ណោះ មិនអាចធ្វើម្ចាស់កម្មសិទ្ធិលើដីធ្លីទេ។ ដូច្នេះ អគារនៅជាន់ផ្ទាល់ដីគឺពួកគេមិនអាចទិញបានឡើយ។ នេះជាការការពារកុំអោយដីកម្ពុជាធ្លាក់ចូលទៅក្នុងដៃអ្នកដែល មិនមែនជាជនជាតិខ្មែរ។
លោកសេក សេដ្ឋា បកស្រាយថា ការដាក់កំណត់នេះស្របតាមច្បាប់របស់ប្រទេសជិតខាង ដូចជាសិង្ហបុរីជាដើម។ នៅប្រទេសនេះ ជនបរទេសអាចសុំទិញអគារសហកម្មសិទ្ធិ ចាប់ពីជាន់ទី៦ឡើងទៅ។ លោកពន្យល់ថា៖ «យើងនៅកំពុងគិតថាចាប់ពីជាន់ទីប៉ុន្មាន យើងអនុញ្ញាតអោយពួកគេទិញបាន។ យើងត្រូវកំណត់បញ្ហានេះទៅតាមស្ថានភាពអចលនវត្ថុជាក់ស្តែងនៅ កម្ពុជា»។ លោកបន្ថែមថា ប្រទេសថៃឈានអនុញ្ញាតអោយជនបរទេសទិញដី ប៉ុន្តែមានលក្ខខណ្ឌមួយចំនួន។ ចំណែកឯការត្រួតពិនិត្យច្បាប់នេះដោយអ្នកតំណាងរាស្រ្ត លោកអនុរដ្ឋលេខាធិការថ្លែងថាមិនទាន់ត្រូវបានកំណត់នៅឡើយទេ។
សិទ្ធិបន្តមរតកត្រូវបានទទួលស្គាល់សម្រាប់ជនបរទេស
លោក សេក សេដ្ឋា គូសបញ្ជាក់ថា អនាគតកម្មសិទ្ធិករជាជនបរទេសទាំងនេះ«នឹងមានសិទ្ធិលក់ ផ្ទេរមរតក ឬដាក់បញ្ចាំទ្រព្យសម្បត្តិអចលនទ្រព្យរបស់ពួកគេ ដោយត្រូវគោរពតាមបទបញ្ជាផ្ទៃក្នុង ដើម្បីការគ្រប់គ្រងល្អ និងការថែរក្សាអគារ»។ សព្វថ្ងៃ បទបញ្ជាផ្ទៃក្នុងនេះកំពុងត្រូវក្រសួងរបស់លោករៀបរៀងឡើង។ បទបញ្ជាផ្ទៃក្នុងនេះនឹងកំណត់សិទ្ធិ ករណីយកិច្ច និងទំនួលខុសត្រូវរបស់ម្ចាស់កម្មសិទ្ធិជាជនបរទេស។
កិច្ចសន្យាគ្រោះថ្នាក់សម្រាប់វិនិយោគិន
រហូត មកដល់ពេលនេះ ជនបរទេសទាំងអស់ដែលចង់ទិញដីធ្លី ឬផ្ទះនៅកម្ពុជា គឺត្រូវខ្ចីឈ្មោះជនជាតិខ្មែរម្នាក់ ហើយជានិច្ចកាលពួកគេត្រូវចុះហត្ថលេខាលើកិច្ចសន្យាមួយរវាងគ្នា ។ បើតាមច្បាប់ភូមិបាល កិច្ចសន្យាមានរយៈពេលមិនអោយលើសពី៩៩ឆ្នាំឡើយ នៅក្នុងក្របខ័ណ្ឌសម្បទានដីធ្លី ហើយចំពោះការជួលផ្ទះគឺច្បាប់មិនមានកំណត់រយៈពេលឡើយ តែរយៈពេលវែងគឺចាប់ពី១៥ឆ្នាំឡើងទៅ។ លោកស៊ុង ប៊ុណ្ណា ភ្នាក់ងារអចលនទ្រព្យម្នាក់លើកឡើងថា ការអនុវត្ថបែបនេះមិនមែនគ្មានគ្រោះថ្នាក់ទេ ព្រោះថាជនបរទេសមិនត្រូវបានការពារក្នុងការបាត់បង់ទ្រព្យសម្បត្តិ ក្នុងករណីមរណភាព លែងលះ ការបន្លំ ឬក៏ការក្ស័យធនរបស់អ្នកអោយឈ្មោះខ្ចីនោះទេ។ «ជាមួយនឹងច្បាប់ថ្មីនេះ វិនិយោគិននឹងមានទំនុកចិត្តច្រើន ជាពិសេសសម្រាប់អ្នកវិនិយោគមធ្យម»។
លោកថោង វិច្ឆិកា បានបញ្ជាក់ថា ក្នុងចំណោមជនបរទេសដែលបានវិនិយោគនៅក្នុងសំណង់សហវិជិតរាជ្យរបស់ De Castle Royal (សព្វថ្ងៃតម្លៃក្នុង១ម៉ែត្រការ៉េចន្លោះពី១ ៣០០ដុល្លារទៅ១ ៨០០ដុល្លារ) មាន១០%ធ្វើឡើងក្នុងនាមក្រុមហ៊ុនពួកគេដោយសហការជាមួយជនជាតិខ្មែរ ដើម្បីរស់នៅ ហើយ៦០%ទៀតគឺដើម្បីធ្វើជំនួញ។ រីឯចំណែកនៅសល់៣០%ទៀត មិនត្រូវបានបញ្ជាក់ពីកម្មវត្ថុច្បាស់លាស់។
សម្រាប់ពេលនេះ គេមិនទាន់ដឹងពីបែបបទច្បាស់លាស់ក្នុងការស្នើសុំធ្វើជាម្ចាស់ កម្មសិទ្ធិរបស់ជនបរទេសនៅឡើយទេ។ ចំណុចនេះកំពុងស្ថិតនៅក្នុងការពិភាក្សា។
0 comments:
Post a Comment